हमका बस पियार चाही(अवधी कविता)

पैसा सोना चांदी टीवी फ्रिज ना हमका कार चाही।
मिलय मेहरूवा सीधी साधी सुन्दर व्यवहार चाही।।
मानय हमका लरिका जस अस हमका ससुरार चाही।
सालिक मानी बहीनी जस हम भाई जस सार चाही।।
हमरे बाप महतारिक अपन मानय मेहरूवक विचार चाही।
टीवी फ्रिज सब कबाड़ हय हमका बस पियार चाही।।
जिदंगी भर साथ देय हमार खुशियन कय संसार चाही।
मानय हमका जान से जादा हमका एक बस नार चाही।।
दहेज हय दुश्मन समाज कय हमका अस विचार चाही।
हमरे सुख दुःख मा साथ देयक हरदम तयार चाही।।
सास ससुर से कन्यादान मा बिटियक उपहार चाही।
देहिम हमरे ताकत हय न दोसरेक घर बार चाही।।
दया प्रेम सेवा मन मा मेहरूवक अस विचार चाही।
मानय हमका अपने लरिका जस अस ससुरार चाही।।
हमहुं जाई हमका बोलावे खुशियन कय त्यौहार चाही।
होली देवारी गुड़िया भौंरी मास दारुक ना आहार चाही।।
मेहरूवक मन मा दया होय जिव खातिर अस विचार चाही।
दुई घर बनय एक परिवार हमका अस ससुरार चाही।।