बुरा ना मानव होली हय(अवधी कविता)

होली हय भाई होली हय बुरा ना मानव होली हय।
फागुन महिनम उड़त हय धुरी मिठ सब कय बोली हय।।
गोंहू अउर महुवा पाक चुनर सब कय धानी हय।
पिचकारी मा रंग भरत देखव बिटिया रानी हय।।
ढोल मजीरा सब लंग बाजत गांव गांव मा फाग हय।
होलिक खुशी सबके मन मा चूल्हम सब के आज हय।।
एक दोसर से बैर भुली कय चारिव लंग सदभाव हय।
गले मिलत सब जन देखव कौनो नाय दुराव हय।।
चारिव लंग अबीर गुलाल सब के हाथेम रंग हय।
नाचत गावत मौज मनावत सब लंग हुडदंग हय।।
प्रहलाद बचे भक्ति से अपने होलिका जरी गय आग मा।
एक आपस कय बैर दुश्मनी भुलाई देव यही फाग मा।।
बिटिया बहिन मईके मा आईं होली कय त्योहार मा।
होलिम भीजी बड़की भौजी रंग कय फुहार मा।।
रंग धरे पुड़िया मा लरिके लिहे बाल्टिम घोरत हय।
गांव भरेंम इधर उधर पिचकारी लिहे डोलत हय।।
कोईक घरमा बरिया फुलौरी कोईक पिचक्का बनत हय।
बड़के बप्पक द्वारेप देखव भांग ठंढाई छनत हय।।