अन्न कय सम्मान करव(अवधी कविता)

अन्न ज़िंदगी मनाई सब कय अन्न कय सम्मान करव ।
अन्न कईहां सुरक्षित राखव अन्न कय ना अपमान करव ।।
मेहनत औ पसीना बहाई कय अन्न उब्जावत हय किसान।
भुंखे पेट मनाईन का खाना खवावत हय किसान।।
मुंडन बिहाव होटल मा खाना वतनै लीहेव जतना खायेव।
खाना से हय ज़िंदगी मनाई कय कबहुं ना बहायो।।
किसान खेत जोती गोडी कय गोंहुं धान लगावत हय।
पानिस सींची कय भौंरी निकाय कय अन्न उबजावत हय।।
अन्न कय एक एक दाना पर लिखा कइयों कय मेहनत कय नाम।
अन्न उब्जावे कय खातिर सकारे से सांझा तक खेतेंम करत काम।।
माटी हवा पानी सुरज कय गर्मी कईयों कई अहसान हय।
पेट भरत जो सगरिव दुनियक किसान सबसे महान हय ।।
हर साल दुनियम लाखों मनाई पेट भर ना खाएस मरी जात हय।
कुछ पैदा करत कुछ खरीदत कुछ कुपोषित खाना खात हय।।
सांझ सकारे घर मईहां नाप तौली कय खाना बनावा करो।
बहाए ना जाय तनिको खाना पियार से खाना खावा करो।।
अन्न सरापत उई मनाईन का जो अन्न कय अपमान करय ।
उई भुंखे नंगे कबहुं नाई रहत जो अन्न कय सम्मान करय ।।
अन्न पेटम परी जो ना तो कुछ दिन मा तन से निकरी प्रान।
गोबर माटी चहला पानिम अन्न उब्जावे धरतीप किसान।।
माथेस लगाय अन्न का अपने डेहरी अउर बखार भरो।
पेट भरत ज़िंदगी देत तुम किसान से पियार करो।।